കളഞ്ഞുപോയ ചിരി

പാതിദൂരം പിന്നിട്ടപ്പോഴാണറിഞ്ഞത്,
ചുണ്ടിലുണ്ടായിരുന്ന ചിരി എവിടെയോ
വീണു പോയെന്ന്...!

പേറിക്കൊണ്ടു വന്ന ഭാണ്ഡത്തിലെവിടെയെങ്കിലും,
ഒരു തരി ചിരിയുണ്ടോയെന്ന് തിരഞ്ഞപ്പോഴാണ്,
പണ്ട് നന്ദിനിപ്പാവക്കുട്ടിയുടെ ചെപ്പിൽ
ഒളിച്ചിരുന്ന ചിരിയെ കണ്ടത്...!!
അതിനെപ്പകുത്തായി പിന്നെ യാത്ര..

പകർന്നു നൽകി അത് തീർന്നപ്പോൾ
പിന്നെ കൂട്ടായത് ഒരു ഊഞ്ഞാൽപ്പാട്ടിലെ
ചിരിയായിരുന്നു...!
ഇറയത്തെ ഓലപ്പന്തലിൽ
മുത്തശ്ശനിട്ട ഊഞ്ഞാലിൽ തലയാട്ടിയിരുന്ന
ചിരിയെ പിടിച്ചുകെട്ടിയായി
പിന്നെ ഊരുചുറ്റൽ..!!

അതു തീർന്നപ്പോൾ പിന്നെയും തിരച്ചിലായി..!
ഇത്തവണ ചിരിയെ കിട്ടിയത്
റെയിൽവേ സ്റ്റേഷനിൽ നിന്നായിരുന്നു..!!
തെക്കോട്ടുള്ള ഏതോ ചൂളം വിളിക്കു പിന്നാലെ തൂങ്ങിയവളെയും
തിരിച്ചുവിളിച്ചു...!!

പിന്നെയിടത്താവളം കടൽത്തീരമായിരുന്നു.
തിരയിൽ തുള്ളിയാഞ്ഞ ചിരിയെ
തടുത്തപ്പോഴേക്കും അവൾ
കരച്ചിലിൻ വക്കത്തെത്തിയിരുന്നു.
തിരിച്ചുവിളിച്ചപ്പോഴേക്കും,
പിൻവിളി കേൾക്കാതെ,
പിടി വിടുവിച്ചവൾ പിൻ വാങ്ങിയിരുന്നു ...!!