ഒഴുകി വന്ന വഴികളോടെല്ലാം
വിരഹമാണ്...
ഇനി ഒഴുകാനുള്ളവയോട് പ്രണയവും...!!
വന്ന വഴികളിലെ പറ്റിപ്പിടിച്ച പായലുകൾ
ഓർമ്മകളാണ്...
ഉള്ളൊന്നു തെറ്റിയാൽ,
വഴുതി വീഴുന്നവ.
ചുരണ്ടി മാറ്റുവാൻ നോക്കുന്തോറും
രക്തം കിനിയുന്നവ,
അകം പൊള്ളിക്കുന്ന
നീറ്റലോടു കൂടിയവ...
കത്തുന്ന ചൂടിൽ വറ്റുന്നത്
എന്നിലെ ഉറവയാണ്..
നുരയും പതയും അവസാന ശ്വാസമാണ്,
കനം തൂങ്ങിയ നെഞ്ചിന്റെ
കിതപ്പാണ്,
ചൂടുപിടിച്ച പാറക്കെട്ടുകളിൽ
തട്ടിച്ചിതറുന്നത് എന്നിലെ സിരകളാണ്,
ഊറ്റിയെടുക്കപ്പെടുന്നതെൻ
ജീവരക്തവും...